“Piiiittt, dhimma kodhungga mbuk Kaka?” akoak Kaka dhari pangkengnga. Se eolok ta’ ngedhing sambi terros mateppa’ kodhungnga se gita’ teppa’.
Ban ce’ ngamoggha, Kaka berka’ ka pangkengnga ale’na.
“Heh, ma’ eangguy?” Kaka sajen ngamok, pas naja’ kodhungnga Pipit.
“Engghi aponapa pas? Paneka kan kodhungnga abdina jugan?” Pipit ta’ kala ngamok.
“Tape ba’na kan buru ngangguy be’eri’, sateya gilirenna sengko’.” Kaka sajen ngamok.
“Samangken Pipit kaputrian, mbuk! Todus manabi Pipit ngangguy kodhung pandhek, padahal ca-kanca Pipit se noro’ kaputrian kodhungnga jang-lanjang ban bar-lebar,” suarana Pipit malere.
“Ye dina!”
Kaka kalowar dhari pangkengnga Pipit sambi majhendher labeng.
“Badha apa reya, gu-laggu la enger?” ebu se mereng nger-enger daddi noro’ posang.
“Ghapaneka Bu, Pipit. Be’eri’ Pipit buru ngangguy kodhung santung se lebar gharuwa. Mestena samangken giliranna Kaka se ngangguy,” careta Kaka se ghi’ peggel.
“Ye, ba’na ngala sakone’! Pipit kan ale’na ba’na,” Ebu abela Pipit.
“Ebu, lako abela Pipit. Padahal Pipit ampon salah,” Kaka atambe peggel.
“Benni abela, tape…..”
“Ambu-ambu, sabban are ekaribut, kodhuuuung malolo! Ba’na kabbi kan muslimah se akodhung. Patengghu la akhlak se bhagus, ta’ padhana sateya, sabban laggu meste atokar masalah kodhung, koduuuung malolo! Ango’an ta’ osah ngangguy kodhung sakale, otaba kodhungnga moso Rama eguntengnga pas ejejjellaghiya ka colo’na ba’na kabbi,” Rama ampon ta’ sabbar.
Kaka sareng Pipit neng-ngenneng nonduk. Badha panyessalan se nyesse’ da’ atena sekadua bang-sebang……
“Mbuk Kaka, ka’dhimma kodhungnga? Sareng Pipit e angguya. Samangken badha mentoring e masjid,” Pipit ampon wa’ kowaghan e ada’na labang pangkongnga Kaka e minggu laggu.
Kaka kalowar dhari pangkengnga, ella rapi, lengkap sareng kodhung pote lebarra.
“Mbuk, sareng Pipit e angguya!” Pipit ella posang.
“Gentian, Non! Be’eri’ kan ba’na la ros-terrosan ngangguy. Sateya giliranna mbuk,” ca’na Kaka sabbar. Pipit ngamok, pas aberka’ ka ebuna.
“Bu, ngobangaghi Pipit kodhung pole,” penta Pipit.
“Bhe, kodhungnga ba’na kan bennya’?”
Ebu sabbar tape saongghuna ella busen sabban are ngadhabbhi potre-potrena se lako atokar masalah kodhung.
“Namong kabbi pandhe’, Bu!” ca’na Pipit.
“Ta’ masalah kan? Se penting auratdha ba’na tamaso’ dada tatotop teppa’, kalambhina ba’na ta’ serret ban ta’ loppa ngagguy kaos soko,” nasehat Ebu.
“Namong, ca-kancana Pipit ngangguy se lebar, Bu” ca’na Pipit.
“Daddhi ba’na ngangguy kodhung se lebar polana ro’-noro’ kanca?” Pipit neng-ngenneng.
“Apa ba’na terro e cap sareng Allah umat se taqlid, se kabbi ibadana pera’ ro’-noro’ malolo? Pipit, betegghareng-oreng se beriman taqlid dalem agama rowa, padhana daun kerreng se tagiba angen. Sakabbina amal ibadah lalakonnna elang e sisi Allah,” Ebu ngoca’ bicaksana.
Pipit ghi’ neng-ngenneng. Cacana ebuna maso’ ka atena.
“Dina, mon ba’na pagghun ngangguya kodhung lebar ye saromban. Mbuk Kaka na enda’ kiya ngangguy se panda’ se penteng ta’ kalowar dhari syariat Islam. Tape, sateya mbukgha terro ba’na ta’ ngamok pole. Daddhi, mbukgha sangaja ngangguy kodhung se lebar rowa,” ca’na ebuna pole. Pipit pas ngalle.
Lema’ belles menit agghi’ Pipit ella siap mangkat ka masjid. Pipit pas asallem ka ebuna.
 | Cerpen Terjemahan Bahasa Madura){kind=link}
0 Comments